افغانستان کې د یتیمانو روزنتون “رایان چلډرن” وتړل شو

طالبانو په کابل کې د افغان سندرغاړي شفیق مرید له لوري جوړ شوی د یتیمانو روزنتون “رایان چلډرن” تړلی دی.

شفیق مرید په یوه خپره کړې خبرتیا کې ویلي، د طالبانو د مشر ملا هبت الله اخوندزاده په امر ټولې خصوصي یتیمخانې باید د دولت ولکه کې راشي او په همدې اساس د هغه روزنتون هم وتړل شو.

د نوموړي په وینا، دوه ورځې وړاندې طالبان پرته له هر ډول مخکېنۍ خبرتیا او رسمي مکتوب د رایان چلډرن روزنتون ته ورغلي او د تړل کېدو پرېکړه یې کړې ده. طالبانو ویلي، چې دا پرېکړه یوازې د رایان چلډرن لپاره نه، بلکې د ټولو هغو خصوصي بنسټونو لپاره ده چې د یتیمانو په برخه کې فعالیت کوي.

د شفیق مرید په وینا، هغه ماشومان چې د روزنتون تر پاملرنې لاندې وو، سمدلاسه دولتي روزنتون ته ولېږدول شول، ځکه په وینا یې رایان چلډرن د نجونو لپاره د بشپړ وخت د استوګنې مرکز نه و، نو یوازې هلکان انتقال شول او وروسته د ماشومانو سرپرستانو خپل ماشومان بېرته ترلاسه کړل.

هغه زیاته کړې، چې یاد روزنتون د مرستو او میاشتنیو ګډونونو له لارې تمویلېده، له همدې امله یې ټول مالي ګډونونه او مرستې درولي دي، څو د خلکو له باور ناوړه ګټه وانه خیستل شي.

د معلوماتو له مخې په دغه روزنتون کې تر سلو شاوخوا یتیم هلکان او نجونې ماشومانې روزل کېدې او تر ۲۵ بېلابېل کارکوونکي یې درلودل چې په بې کارۍ سره یې ژوره اندېښنه ښودل شوې ده.

شفیق مرید ټینګار کړی، چې که څه هم رایان چلډرن به نور د یتیمخانې او ښوونځي په توګه فعالیت ونه کړي، خو د ماشومانو ملاتړ به نه پرېږدي او هڅه کوي دا بنسټ له سره د یوې مرستندویه ادارې په توګه تنظیم کړي، څو د ماشومانو د زده کړو، هوساینې او مالي اړتیاوو ملاتړ ته دوام ورکړي.

نوموړي له ټولو ملاتړ کوونکو، داوطلبانو او مرسته کوونکو مننه کړې او ویلي یې دي، چې د رایان چلډرن اغېز او لاسته راوړنې به هېڅکله هېرې نه شي.

طالبانو تر دې وړاندې په هېواد کې د خیریه بنسټونو فعالیتونه هم محدود کړي دي.

تراوسه د دغې ډلې اړوندو ادارو رسماً په دې تړاو څه نه دي ویلي.

ABN