اوچا: د افغانستان په ختیځ کې سېلابونو ۲۶ کسان مړه کړي دي

د ملګرو ملتونو د بشري مرستو د همغږۍ دفتر (اوچا) ویلي، چې د دوشنبې ورځې سېلابونو د افغانستان په ختیځ کې ۲۶ کسان مړه او ۲۴ نور ټپیان کړي دي.

د اوچا د چهارشنبې، د چنګاښ ۳۱مې، په خپور شوي راپور کې راغلي، چې دغو سېلابونو په نورستان، ننګرهار او بغلان ولایتونو کې د سر او مال درانه زیانونه اړولي دي.

د راپور له مخې، د نورستان ولایت په مرکز پارون کې سېلابونو ۲۳ کسان مړه کړي، ۱۵ نور یې ټپیان کړي او یو شمېر نور لا هم ورک دي. د ورکو کسانو د موندلو لپاره د لټون عملیات لا هم روان دي.

اوچا زیاته کړې، چې په همدې مهال د ننګرهار په تورخم سرحدي بندر کې هم سېلاب راغلی، چې له امله یې له پاکستانه راستانه شوي درې کډوال مړه او نهه نور ټپیان شوي دي.

د یادې ادارې په وینا، د لغمان ولایت د علینګار ولسوالۍ سېلابونو هم کرنیزې ځمکې او د اوبو لګولو سیستمونه زیانمن کړي، خو تر اوسه د احتمالي مرګ‌ژوبلې په اړه معلومات نه دي ورکړل شوي.

اوچا ټینګار کړی، چې تر ټولو ډېر مالي زیان د نورستان ولایت مرکز، پارون، ته اوښتی دی.

دا په داسې حال کې ده، چې د طالبانو چارواکو په نورستان کې د سېلابونو له امله د مړو شمېر ۲۳ تنه، د ټپیانو شمېر له ۸۰ څخه ډېر او د ورکو کسانو شمېر له ۱۰۰ څخه زیات ښودلی دی.