د نورستان په ویجاړونکو سېلابونو کې ۲۳ تنه مړه، ۸۰ ټپیان او نږدې ۱۰۰ کسان ورک دي

د پېښو پر وړاندې د مبارزې ملي چمتووالي ادارې د تازه معلوماتو له مخې، نن له غرمې وروسته د نورستان ولایت په مرکز پارون او شاوخوا سیمو کې د شدیدو سېلابونو له امله ۲۳ کسان مړه، ۸۰ نور ټپیان شوي او نږدې ۱۰۰ کسان لا هم ورک دي.

د دې ادارې مرستیال ویاند تاج محمد همت ویلي، چې تر اوسه د ۱۵ مړیو جسدونه له خاورو او خټو را ایستل شوي، او د لټون او ژغورنې عملیات په پراخه کچه دوام لري. هغه زیاته کړه، چې سېلابونو ۷ کورونه بشپړ او ۲۳ نور یې برخه برخه ویجاړ کړي دي. همدارنګه، ۷۰ دوکانونه، ۴۰ سپک او درانده موټرونه او ۱۱ هوټلونه هم بشپړ یا نسبي زیان لیدلی دی.

مسوولانو ټینګار کړی، چې دا شمېرې لومړنۍ دي او د لټون، ژغورنې او د زیانونو د ارزونې له دوام سره به ښایي د قربانیانو شمېر او د مالي زیانونو کچه لوړه شي. د پېښو پر وړاندې د مبارزې ملي اداره وايي، چې ژغورونکې ډلې لا هم په سیمه کې فعالې دي او د سروې او ارزونې بهیر بشپړېدو سره به کره او نوي شوي معلومات رسنیو ته وړاندې شي. ادارې په دې شمېرو کې د بدلون احتمال هم رد نه کړ.

دغه سېلابونه نن له غرمې وروسته راوتلي او تر ډېره یې پارون ښارګوټی او ورڅېرمه سیمې اغېزمنې کړې دي، چې سخت مالي او تلفاتي زیانونه یې اړولي دي.

زموږ انګلیسي ویبپاڼه: