یو بریتانوي څېړنیز مرکز  افغانستان کې د کوکنارو د کښت د زیاتوالي خبر ورکړی

یو بریتانوي څېړنیز مرکز  افغانستان کې د کوکنارو د کښت د زیاتوالي خبر ورکړی
د بریتانیا څېړنیز مرکز «السیس» په خپل وروستي راپور کې ویلي چې د ۲۰۲۶ کال پر مهال، د طالبانو تر واک لاندې افغانستان کې د کوکنارو کښت، په ځانګړې توګه په بدخشان ولایت کې، زیات شوی دی.
د دې راپور له مخې، چې د دوشنبې په ورځ (۲۴ حمل) خپور شوی، کوکنار لا هم د افغانستان د کلیوالو خلکو د عاید مهمه سرچینه ده.
دغه څېړنه د افغانستان او سرحدي سیمو د ناقانونه اقتصادونو په برخه کې د نامتو څېړونکي ډیویډ منسفیلډ له خوا ترسره شوې او د «السیس» څېړنیز مرکز له لوري خپره شوې ده.
د راپور موندنې ښيي چې د طالبانو تر واک لاندې د افغانستان په ډېرو سیمو کې بزګران یا خپل کښت ته دوام ورکوي، یا هم د نشه‌يي توکو د کښت او تولید لپاره ګاونډیو هېوادونو ته ځي.
راپور زیاتوي چې اقتصادي فشارونو له امله، د افغانستان په سوېل لوېدیځ کې یو شمېر بزګران د کوکنارو د کښت لپاره پاکستان او ایران ته کډه کېږي.
سره له دې چې اوس مهال ډېری څارونکي پر مصنوعي نشه‌يي توکو تمرکز کوي، خو د افغانستان د تریاکو د لویو زېرمو او د کوکنارو د کښت د پراختیا له امله، اروپا ته د هېروئینو عرضه لا هم دوام لري.
راپور همدارنګه وایي چې د تریاکو د هېروئینو ته د بدلولو بهیر کې پرمختګ او په سیمه‌ییزو بازارونو کې د نشه‌يي توکو له قانوني موادو سره ګډول، په اروپا کې د هېروئینو بازار نور هم ګټور کړی دی.