امریکا: که طالبان تاوتریخوالی کم نه کړي؛ د پوځونو وتلو لړۍ دروو

امريكايي چارواکو یو ځل بیا ګواښ کړی، چې که طالبان د تاوتریخوالي کچه ټیټه نه کړي؛ نو دوی به له افغانستان څخه د خپلو ځواکونو د وتلو لړۍ ودروي.

په افغانستان کې د امریکا سرپرست سفیر راس وېلسن له فرانس پریس سره په مرکې کې ویلي، چې افغانستان کې د طالبانو له لوري د تاوتریخوالي د کچې د لوړېدو له کبله اندېښنې لري.

نوموړي ویلي، طالبان دې دا فکر نه کوي، چې دوی به د سرتېرو  تر وتلو وروسته له افغانستان سره خپلې اړیکې پرې کوي؛ بلکې دوی به له ترهګري سره خپلې مبارزې ته دوام ورکړي.

وېلسن ویلي، چې طالبانو د دوحې تړون نقض کړی او په دې وروستیو کې یې پر ملکي وګړو د تاوتریخوالي کچه لوړه کړې ده.

د ده په وینا، چې که چېرته طالبان خپلو بریدونو ته دوام ورکړي؛ نو دوی به تر هغې په افغانستان کې ښکېل پاتې شي، چې ډاډمن نه شي.

ده زیاته کړې، چې افغانستان کې لا هم د القاعده ډله فعاله ده، چې امریکا او نړۍ ته ترې ګواښ پېښېدای شي.

وېلسن  افغانستان کې وروستیو بریدونو ته په اشارې ویلي چې تر ډېره په یادو بریدونو کې طالبان ښکېل دي او دوی به هېڅکله افغانستان یوازې پرې نه ږدي.